Bukkumbode

Bukkumbode 2018

A-j proem’n hebt, he-j ok pitt’n

Alleboarstens, wat giet zo’n joar töch weer snelle vörbie. En vluuk en ’n zucht, en dan giet ook Dalfsen wieder over noar januari.  Wulle bunt al weer anëköm’n bij de letste dönkere dagen van ’t joar en dan stiet zoals heul Dalfsen wel wet Bukkum veur de deur, als letste drempel noar een neie episode in ’t leâv’n. Een beste drempel, maar met een bettie goede wil goed te nem’n. Kunt wulle in disse tied trouwn’s nog wel sprek’n over de letste dönkere daag’n van het joar? Veur jë ‘t wet stiet er allerlei partijen veur de schoefdeur’n van de Trefkoele, det zegt dat wulle in Dalfsen wel wat raasistich bezig bunt. Wellicht kuj better sprek’n van de letste korte daag’n van het joar, moar met de daagse vertrutting komt dan vast wieder de dwargen in opstand, wat ’t er allemoal niet makkelijk op mak. Gelukkig is ’t afgë-löp’n joar het Nedersaksisch als offizjeele taal erkend: wulle zelf hoeft oans niet lang’r achter-ü-steld te vuul’n.

Nee, ’t begunt langzaam moar zekker een tradizie te wen, om alles wat jan en alleman roept onder een vergreutglasie te leg’n en het bezweern’de vingertie op te heffen. Wulle magt ons in Dalfsen gelukkig priez’n dat ’t hier nog niet zover eköm’n is, moar loat wie d’r met elkander veur waak’n. Den dikk’n van Van Daal’n hef ‘blokkeerfriezen’ as woord van ’t joar uut-e-roep’n, maar aj die Friez’n zelf blokkeert dan moej mirakels goed oppass’n. Sommig’n hebt ‘n best tik van de mol’n u-had, en dan stiet de hele möl’n op de kop. Muj dat dan wil’n? Gelukkig, wulle kunt in Dalfsen nog altied cowboytie en indiaantie speul’n, en met de karst legt wej geweun een dik’n, vet’n kalkoene in de microwave zonder ons al tevülle zörg’n te maak’n. En gelukkig kunt we hier gewoon nog viss’n in de Vechte, in de hoop een mooie Bukkum aan ’t hakie te pieren. Dat det met ‘t zoete in plaats van ‘t zolte water in oog’nskouw e-nüm’n wat lastig wurdt, liekt mie duudelijk, maar ’t giet om ’t idee en de vrijhied om dingen toe doen die een mense zelf wult. En ’t kan gien kwoad om met ’n bettie zelfspot noar ’t leven te kiek’n. Dat zöll’n meer mensen iens mut’n doen.

Met ’t kriek’n van ’t neie joar kriegt Dalfsen ook een neie burgemeister. Van de vrouwlijke kante nog weh, en doarmee hef Dalfsen voor zichzelf een primeurgie te pakken. Wat zol ’t toch mirakels mooi wen, als onze Erica een momentie weet te vind’n om op oldejoarsdag al dat voet’nwark in de Trefkoele te aanskouw’n. Een bettere manier van integreer’n liekt mie niet mogel’k. Op social media hef ze al eroep’n dat ze groag een lessie uitegreer’n wil hebben, maar as ze ienmal met de Dalfser Bukkumbevolking van boer’n, burgers en buut’nluu van doen hef dan is dat snel-ë-regelt. ’t Skient dat de neie burgemeester – niets ten nadele van Han Nutt’n, maar de Dalfsenoar kiekt er naar uut – nog altied een huusie zoekt om in te verbliev’n. ’t Kan moar zo det de Bukkumbuurte, ’t Karkplien of een ander skier plekkie in het darp uutkomst biedt, maar dan moej wel teeg’n een bettie reuring kun’n. A-j proem’n hebt, he-j noe ienmaal ok pitt’n. Doar had den olde burgervader ’t afgelopen joar weer wat meer moeite met.

Woar we het overigens een joar  ‘eleed’n had’n over de miseraable stoat van ’t Neerlandse voetbal, kunt wej noe niet anders zeg’n dat ’t er allemoal een stuk better uutziet. Zo giet ons nationale team dit veurjoar noar Portugal om doar te stried’n veur de Nations League. Det klünk allemoal hip, moar ’t stelt nog niet al te vulle veur. Eerst zien, dan geleuv’n, zoals det met meer ding’n in ’t leven giet. In de drieënveertig joar van Bukkum hebt wulle ok vele hoogtepunt’n, maar ook dieptepunt’n ekent. An ’t end van ’t lietie –  net noa ‘t zinnegie dat de Dalfser Bukkums  altied vertier zoekt – kump ’t uuteindel’k allemoal wieder op zien pööties terecht. Dat zal dit joar niet aans wên. Wie ziet oe op Oldejoarsdag, daar kuj van op an. En maakt d’r met mekander een skier tweeduuzend-en-neê’ntien van!